रत्नागिरी : रत्नागिरी जिल्ह्यात लोटे एमआयडीसीतील घरडा केमिकल्स या एकाच कारखान्यातील ४० जणांना करोनाची बाधा झाल्याचे आज (१४ जुलै) स्पष्ट झाले आहे. तेथील कामगारांची तपासणी खासगी प्रयोगशाळेत करण्यात आली होती. त्याशिवाय, रत्नागिरी येथील तीन आणि लांजा येथील पाच असे दिवसभरात ४८ नवे रुग्ण आढळले आहेत. जिल्ह्यातील करोनाबाधितांची संख्या आता ९६० झाली आहे. रत्नागिरीत दाखल असलेल्या एका करोनाबाधिताचा आज मृत्यू झाला. त्यामुळे मृतांची संख्या ३३ झाली आहे. दरम्यान, सिंधुदुर्ग जिल्ह्यात गेल्या दोन दिवसांत नव्या रुग्णाची नोंद झालेली नाही.
