देवरूख : देवरूख शिक्षण प्रसारक मंडळाच्या सृजन सायन्स अँड इनोव्हेशन ॲक्टिव्हिटी सेंटरतर्फे शनिवार, दि. २१ नोव्हेंबर रोजी शालेय विद्यार्थ्यांसाठी वसुंधरा ऑलिंपियाड जिल्हास्तरीय स्पर्धेचे आयोजन करण्यात आले आहे.
ही स्पर्धा चौथी ते बारावीतील सर्व विद्यार्थ्यांसाठी ४ विविध गटांमध्ये होणार आहे. वसुंधरा ऑलिंपियाडमध्ये पर्यावरण प्रश्नमंजूषा स्पर्धेसह पर्यावरण पूरक घोषवाक्य व पोस्टर निर्मिती स्पर्धा होणार आहे. प्रश्नमंजूषा स्पर्धा बहुपर्यायी प्रश्न( स्वरूपात असणार असून, या स्पर्धेसाठी नकारात्मक गुणांकन असणार नाही.
पर्यावरण प्रश्नमंजूषा स्पर्धेचा पेपर मराठी व इंग्रजी दोन्ही माध्यमातून एकत्रित असणार आहे. प्रश्नमंजूषा पर्यावरण, विज्ञान, शाश्वत विकास आणि भविष्य या प्रमुख मुद्द्यांवर समाविष्ट असून, या स्पर्धेमध्ये पर्यावरण व जैवविविधता, जलसंवर्धन, नवीकरणीय ऊर्जा, हवामान बदल, कचरा व्यवस्थापन, वन व वन्यजीव संवर्धन, विज्ञान व शाश्वत विकास या विषयावर आधारित असणार आहे. विद्यार्थ्यांची नोंदणी झाल्यावर स्पर्धक विद्यार्थ्यांना ‘मॉडेल क्वेश्चन सेट’ आयोजकांकडून पाठवला जाणार आहे.
वसुंधरा ऑलिंपियाड स्पर्धेसाठी चौथी ते पाचवी, सहावी ते आठवी, नववी-दहावी आणि अकरावी-बारावी असे चार गट असतील. पर्यावरण प्रश्नमंजूषा स्पर्धेसह पर्यावरण पूरक घोषवाक्य व पोस्टर निर्मिती स्पर्धा यावेळी होणार आहे.
पोस्टर निर्मिती स्पर्धेसाठी स्पर्धकांना १ तासाचा अवधी दिला जाणार असून आयोजकांकडून ३०”x२२” आकाराचा कार्डबोर्ड पेपर पुरवला जाणार आहे. या स्पर्धेसाठी रंगसाहित्य स्पर्धकांनी स्वतः आणायचे आहे. घोषवाक्य स्पर्धेतील सहभागी स्पर्धकांनी घोषवाक्य स्पर्धेच्या ठिकाणीच तयार करायचे आहे. घोषवाक्य स्पर्धेसाठी आयोजकांतर्फे पेपर पुरवला जाणार आहे. सहभागी स्पर्धकांनी सोबत रायटिंग पॅड आणणे अपेक्षित आहे. स्पर्धांचा निकाल स्पर्धा संपल्यानंतर लगेचच जाहीर केला जाणार आहे.
स्पर्धेसाठी सहभागी स्पर्धकांना व शाळांना आकर्षक रोख बक्षिसे, प्रशंसा प्रमाणपत्रे आणि सहभाग प्रमाणपत्रे दिली जाणार आहेत.
सर्व स्तरावर उत्कृष्ट कामगिरी करणाऱ्या विद्यार्थ्यांना गुणवंत विद्यार्थी पदकाने सन्मानित केले जाणार आहे. सर्व स्तरांवर सर्वाधिक गुणवंत विद्यार्थी असलेल्या शाळेला विशेष चषक दिला जाणार आहे. शाळेच्या मुख्याध्यापकांसाठी विशेष प्रशंसा प्रमाणपत्र दिले जाणार आहे.
स्पर्धेसाठी माफक ५० रुपये नोंदणी शुल्क ठेवण्यात आले आहे. शाळांनी सहभागी होण्यासाठी व अधिक माहितीसाठी ८०८७७०८३८० या क्रमांकावर संपर्क साधण्याचे आवाहन विज्ञान केंद्राचे संचालक डॉ. चंद्रशेखर केदारी यांनी केले आहे.
स्पर्धेसाठी नावनोंदणी https://forms.gle/ywJAQZiXyYNwrvB3A या लिंकवर रविवार दि. १ नोव्हेंबर, २०२६ पर्यंत करायची आहे.
Follow Kokan Media on Social Media
Something went wrong. Please refresh the page and/or try again.
