पर्यटन पंढरी कोकणाचा सर्वांगीण विकास करण्यावर भर - मुख्यमंत्री

सावंतवाडी : कोकणाला निसर्गाचा वरदहस्त लाभला आहे. ‘येवा कोकण आपलोच आसा’ असा पाहुणचार करणाऱ्या कोकणाचा सर्वांगीण विकास करण्यावर भर आहे, असे प्रतिपादन मुख्यमंत्री एकनाथ शिंदे यांनी केले.

सावंतवाडी शहर आणि सावंतवाडी विधानसभा मतदारसंघातील विविध ११० कोटी रुपयांच्या विकासकामांचे लोकार्पण आणि भूमिपूजन मुख्यमंत्री एकनाथ शिंदे यांच्या हस्ते आज झाले. त्यावेळी ते बोलत होते. ते म्हणाले, राज्यातील जनतेला पायाभूत सुविधा उपलब्ध करून देण्यासाठी अनेक प्रकल्प राज्यात सुरू आहेत. देशात सर्वांत जास्त पायाभूत सुविधा प्रकल्प सुरू असलेले महाराष्ट्र हे एकमेव राज्य आहे, महाराष्ट्राला पायाभूत सुविधा उपलब्ध करुन देण्याबरोबरच युवा पिढीला रोजगार उपलब्ध करून देण्यावर भर दिला आहे. नोकरी मागणाऱ्या हातापेक्षा नोकरी देणारे हात निर्माण करण्यासाठी प्रयत्न सुरू आहेत. महिला बचत गटांना सक्षम करण्यासाठी प्राधान्य देण्यात येत आहे. मूलभूत सुविधांबरोबरच आरोग्य सुविधाही जिल्हा, तालुका पातळीपर्यंत आणि ग्रामीण भागापर्यंत सक्षम करण्यावर भर देण्यात येत आहे. महाराष्ट्र वेगाने प्रगत होत आहे. यासाठी केंद्राकडूनही मदत मिळत आहे. केंद्र सरकारकडे पाठविण्यात येणाऱ्या प्रस्तावांना तातडीने मंजुरी देऊन निधी देण्यात येत आहे. त्यासाठी प्रधानमंत्री नरेंद्र मोदी यांचे आभार मानतो. भारत देश प्रगतीने विकास करत असून देशाची अर्थव्यवस्था ११ क्रमांकावरून पाचव्या क्रमांकावर आली आहे. तसेच जी-२० चे अध्यक्षपद आपल्या देशाला मिळाले ही अत्यंत गौरवाची बाब आहे. केंद्र सरकारने सहकार विभागाच्या माध्यमातून १० हजार कोटी आयकर माफ केला आहे. त्यामुळे सहकार विभागाला दिलासा मिळाला आहे.

महाराष्ट्र वेगाने प्रगती करत असून या राज्य शासनाच्या कालावधीत १ लाख १४ हजार कोटी परदेशी गुंतवणूक महाराष्ट्रात आलेली आहे, असे सांगून मुख्यमंत्री म्हणाले, या गुंतवणुकीमुळे रोजगार निर्मितीला चालना मिळेल, कोकणाच्‍या विकासासाठी कोकण प्राधिकरणाची निर्मिती करण्‍याचे काम सुरू केले आहे. कोकणातील कोस्‍टल रोड एमएसआरडीसीच्‍या माध्‍यमातून पूर्ण करण्‍यात येईल. कोकणात सबमरीन सुरू करण्‍यासाठी आवश्‍यक निधी देण्‍यात येईल. कोकणातील स्‍थानिक मालाचे ब्रॅंडिंग करून मार्केटिंग उपलब्‍ध करून देण्‍यासाठी प्रयत्‍न केले जातील. सावंतवाडी शहरातील मल्‍टीस्‍पेशालिटी हॉस्‍पिटलही उभारण्‍यासाठी निधी देऊ. विकास टप्‍पा क्रमांक २ साठी मागणीनुसार आवश्‍यक सर्व निधी दिला जाईल. समृद्ध कोकण घडविण्‍यासाठी सर्वांनी मिळून प्रयत्‍न करू या, असे आवाहन त्‍यांनी यावेळी केले.

दरडोई उत्पन्नात वाढ होणे आवश्यक – नारायण राणे
केंद्रीय मंत्री नारायण राणे म्‍हणाले, कोकणाचा गतिमान विकास होण्‍यासाठी दरडोई उत्‍पन वाढीसाठी प्रयत्‍न होणे आवश्‍यक आहे. जिल्‍ह्यात दोडामार्ग येथे सुरू झालेल्‍या एमआयडीसीमध्‍ये जास्‍तीत जास्‍त उद्योग येतील. यासाठी केंद्र आणि राज्‍य शासन जास्‍तीत जास्‍त प्रयत्‍न करेल. आत्‍मनिर्भर भारत बनविण्‍यासाठी सर्वांचे सहकार्य आवश्‍यक आहे.

मोती तलावात शिवाजी महाराजांचा पुतळा
प्रास्ताविकात शालेय शिक्षणमंत्री दीपक केसरकर म्‍हणाले, जास्‍तीत जास्‍त उद्योग सिंधुदुर्गामध्‍ये आणून येथील युवकांना रोजगाराची संधी मोठ्या प्रमाणात मिळावी, यासाठी आपण सर्वांनी प्रयत्‍न करावेत. त्यामुळे सिंधुदुर्ग हे स्‍वयंरोजगाराचे केंद्र ठरेल. गोवा राज्‍यात ज्‍याप्रमाणे उत्कृष्ट पर्यटन आहे, त्याच धर्तीवर सिंधुदुर्गमध्ये उत्कृष्ट पर्यटन निर्माण होणे आवश्यक आहे. पर्यटनासाठी सर्व सुविधा उपलब्ध होणे आवश्यक आहे. कमीत कमी खर्चामध्ये सावंतवाडीत नदी शुद्धीकरणाचा पायलट प्रोजेक्ट राबविण्यात येत आहे. त्यासाठी शासनाकडून निधीही मिळेल. सावंतवाडी शहरात छत्रपती शिवाजी महाराजांचा पुतळा नाही. त्यामुळे छत्रपती शिवाजी महाराजांचा पुतळा मोती तलावाच्या मध्यभागी बांधण्यासाठी एक कोटीचा निधी दिला जाईल. प्रधानमंत्री नरेंद्र मोदी यांच्या हस्ते नौदलाचा वर्धापन दिन सिंधुदुर्ग जिल्ह्यात साजरा होणार आहे. या कार्यक्रमांचे भव्यदिव्य आयोजन करण्यात येईल.

यावेळी मुख्यमंत्री एकनाथ शिंदे यांच्या हस्ते सावंतवाडी शहरातील संत गाडगेबाबा महाराज मंडई आणि शॉपिंग सेंटर विकसित करणे, सावंतवाडी पालिकेच्या जिमखाना मैदानावर द्रोणाचार्य पुरस्कार विजेते गुरुवर्य रमाकांत आचरेकर ड्रेसिंग रूम बांधणे, महाराष्ट्र अग्निसुरक्षा अभियान (राज्यस्तर) योजनेअंतर्गत अग्निशमन वाहन खरेदी, अग्निशमन सेवा आणि आणीबाणीच्या सेवांचे बळकटीकरण (जिल्हास्तर) या योजनेअंतर्गत अग्निशमन केंद्र, अग्निशमन सेवेतील अधिकारी/कर्मचारी यांचे सेवा निवासस्थान बांधकाम, महाराष्ट्र सुवर्ण जयंती नगरोत्थान (राज्य स्तर) योजनेअंतर्गत सावंतवाडी शहरातील पाणीपुरवठा योजना सुधारणा, सावंतवाडी शहरातील जीर्ण झालेली वितरण व्यवस्था बदलणे आदींसह सुमारे ११० कोटी रुपये कामांचा शुभारंभ करण्यात आला.

वारकरी संप्रदायाला वाहन
उद्योगमंत्री उदय सामंत यांनी हळवल (ता. कणकवली) येथील वारकरी संप्रदायाला प्रवास करण्यासाठी चारचाकी वाहन उपलब्ध करून दिले. या वाहनाचे लोकार्पण मुख्यमंत्री एकनाथ शिंदे यांनी वेंगुर्ले येथे करून हळवलच्या वारकरी संप्रदायाला शुभेच्छा देत अभिनंदन केले.

समारंभाला ग्रामविकास क्रीडा आणि युवक कल्याणमंत्री गिरीश महाजन, आमदार रवींद्र फाटक, आमदार भरत गोगावले, आमदार नितेश राणे, माजी खासदार नीलेश राणे, युवराज लखमराजे सावंत-भोसले, कोकण विभागीय आयुक्त डॉ. महेंद्र कल्याणकर, जिल्हाधिकारी के. मंजूलक्ष्मी, मुख्य कार्यकारी अधिकारी प्रजित नायर, जिल्हा पोलीस अधीक्षक सौरभ अग्रवाल, प्रातांधिकारी प्रशांत पानवेकर आदी उपस्थित होते.