रत्नागिरी कऱ्हाडे ब्राह्मण संघाचे कार्य उत्तम – रवींद्र प्रभुदेसाई

रत्नागिरी : रत्नागिरी कऱ्हाडे ब्राह्मण संघ आपल्या ज्ञातिबांधवांनाच नव्हे तर समाजातील इतरही चांगल्या व्यक्तींना पुरस्कार देत आहे, हे कार्य उत्तम आहे, असे गौरवोद्गार ज्येष्ठ उद्योजक आणि पितांबरी उद्योग समूहाचे व्यवस्थापकीय संचालक रवींद्र प्रभुदेसाई यांनी काढले.

रत्नागिरी कऱ्हाडे ब्राह्मण सहकारी संघाच्या पुरस्कार वितरण सोहळ्यात ते बोलत होते. संघाच्या राणी लक्ष्मीबाई सभागृहात हा शानदार कार्यक्रम रंगला. यावेळी श्री. प्रभुदेसाई म्हणाले, कोणाच्या पोटी जन्माला यायचे ते परमेश्वर ठरवतो. पण कर्तृत्व आपल्या हातात असते. पुरस्कारविजेते हलाखीच्या परिस्थितीत, मध्यम कुटुंबातून पुढे आलेले आहेत. प्रचंड कष्ट करून आपल्या क्षेत्रात पुढे जाऊ शकतो, हे या व्यक्तींना दाखवून दिले आहे. आजच्या पुरस्कारप्राप्त व्यक्ती उत्तुंग आणि समाजाला प्रेरणा देणाऱ्या आहेत. त्यामुळे आजचा कार्यक्रम वेगळ्या उंचीवर पोहोचला आहे. परिपूर्णता, रोज (नियमित) अभ्यास, साधना, का या शब्दावरून अनेक प्रश्नांची उत्तरे शोधणे आणि चांगले राहणीमान, अशी पुरस्कार या शब्दातील पाच अक्षरांची फोड आहे. त्यानुसार आचरण करणाऱ्यांनाच पुरस्कार मिळतात. पुरस्कार विजेत्यांनी आपापल्या क्षेत्रात या सर्वाला न्याय दिला आहे, त्यामुळे ते पुरस्काराचे मानकरी ठरले आहेत.

रत्नागिरी कऱ्हाडे ब्राह्मण संघाचे अध्यक्ष माधव हिर्लेकर यांनी सांगितले की, अर्ज न मागवता कार्यकारिणीतर्फे माहिती मिळवून या पुरस्कारांची निवड केली जाते. शाल, पुस्तक, रोख रक्कम, स्मृतिचिन्ह असे पुरस्काराचे स्वरूप आहे. तसेच दिव्यागांनी तयार केलेले पुष्पगुच्छ दिले जातात. कऱ्हाडे ब्राह्मण संघाला ९५ वर्षे झाली असून संस्था शतक महोत्सवाकडे वाटचाल करत आहे. यानिमित्त नवी वास्तू उभारण्याचा संकल्प आहे. त्याकरिता देणगीदारांनी मदत करावी, असे आवाहन त्यांनी केले.

यावेळी आदर्श कीर्तनकार पुरस्कार हभप दत्तात्रेय तथा दत्तराज वाडदेकर (देवरूख), आचार्य नारळकर आदर्श शिक्षक पुरस्कार सदानंद ठाकूरदेसाई (मोरोशी, ता. राजापूर), आदर्श पौरोहित्य पुरस्कार वेदमूर्ती गणेश खेर (भू, राजापूर), धन्वंतरी पुरस्कार डॉ. शाम जेवळीकर (रत्नागिरी), दर्पण पुरस्कार सुरेश सप्रे (देवरूख), उद्योजक पुरस्कार महेश गर्दे (रत्नागिरी), उद्योगिनी पुरस्कार शिल्पा नितीन करकरे (तुरळ, ता. संगमेश्वर) यांना प्रदान करण्यात आला. राणी लक्ष्मीबाई गौरव पुरस्कारप्राप्त खो-खोपटू सायली कर्लेकर (रत्नागिरी) रोहा (रायगड) येथे राज्यस्तरीय खो-खो स्पर्धेत व्यस्त असल्याने ती समारंभाला येऊ शकली नाही, तिच्या वतीने आईने पुरस्कार स्वीकारला.

सर्व पुरस्कारमूर्तींनी मनोगत व्यक्त करून संघाने दखल घेतल्याबद्दल आभार मानले. या पुरस्काराने आमची जबाबदारी अधिक वाढली आहे. आमच्या छोट्या कार्याची दखल संघाने घेतली, याबद्दल खूप आनंद वाटतो, अशा प्रतिक्रिया त्यांनी व्यक्त केल्या. बोधकथा सांगताना सदानंद ठाकूरदेसाई यांनी राजा व चार राण्यांची गोष्ट सांगितली. मृत्यूनंतर संपत्ती उंबऱ्यापर्यंत, कुटुंबीय अंगणापर्यंत, स्थावर मालमत्ता जमीनजुमला, झाडेझुडपे स्मशानापर्यंत आणि केलेले सत्कर्म शेवटपर्यंत साथ देते. त्यामुळे सत्कर्म केले पाहिजे, असे आवाहन त्यांनी केले. डॉ. जेवळीकर, श्री. वाडदेकर यांनी संघाचे कौतुक केले. पत्रकार सुरेश सप्रे यांनी सांगितले की, पत्नीचे सहकार्य आणि काही कटू निर्णयामुळे मी कर्करोगासारख् दुर्धर आजारातून बरा झालो आणि २५ वर्षे काम करत आहे. कऱ्हाडे संघाने दिलेला दर्पण पुरस्कार मी विसरू शकत नाही. महेश गर्दे यांनी सांगितली की, मी रक्तदाता सूची करण्यासारखी अनेक सामाजिक कामे केली. आता सिद्धाई फूड्सच्या माध्यमातून महिला बचत गट आणि ग्रामीण भागातील अनेकांना स्वयंरोजगार उपलब्ध करून देत असल्याचे सांगितले.

याप्रसंगी देणगीदारांचाही सन्मान करण्यात आला. सूत्रसंचालन सौ. रेणुका मांदुस्कर यांनी केले. सौ. प्रतिभा प्रभुदेसाई यांनी आभार मानले.

पुरस्कारप्राप्त सर्व मान्यवरांचे आणि रवींद्र प्रभुदेसाई यांचे मनोगत पाहा पुढील लिंकवरील व्हिडिओत… https://youtu.be/g-sLUhmqSFE

(प्रत्येक नावासमोर क्लिक केल्यावर त्या मान्यवराचे भाषण ऐकता येईल.)

कऱ्हाडे ब्राह्मण संघाचे अध्यक्ष माधव हिर्लेकर https://youtu.be/g-sLUhmqSFE?t=10

नेत्रतज्ज्ञ डॉ. श्याम जेवळीकर https://youtu.be/g-sLUhmqSFE?t=485

वेदमूर्ती गणेश दत्तात्रय खेर https://youtu.be/g-sLUhmqSFE?t=598

कीर्तनकार हभप दत्तात्रेय तथा दत्तराज नरसिंह वाडदेकर https://youtu.be/g-sLUhmqSFE?t=632

पत्रकार सुरेश वामन सप्रे https://youtu.be/g-sLUhmqSFE?t=999

शिक्षक सदानंद रघुनाथ ठाकुरदेसाई https://youtu.be/g-sLUhmqSFE?t=1350

उद्योजक महेश मोहन गर्दे https://youtu.be/g-sLUhmqSFE?t=1955

उद्योजिका शिल्पा नितीन करकरे https://youtu.be/g-sLUhmqSFE?t=2244

‘पितांबरी’चे रवींद्र प्रभुदेसाई https://youtu.be/g-sLUhmqSFE?t=2541
…………