महावितरणच्या ऑनलाइन वीजबिल भरणा करण्यात कोकण आघाडीवर

रत्नागिरी : महावितरणने उपलब्ध करून दिलेल्या ऑनलाइन पेमेंट सुविधांचा वापर करीत राज्यातील महावितरणच्या घरगुती, औद्योगिक आणि वाणिज्य वर्गवारीतील वीजबिल भरणा करण्यात कोकण विभाग आघाडीवर आहे.

राज्यातील एक कोटी ११ लाख ५३ हजार ७०३ लघुदाब ग्राहकांनी नोव्हेंबर महिन्यात ऑनलाइन पेमेंटचा पर्याय स्वीकारला. या ग्राहकांकडून वीजबिलाच्या भरण्यापोटी एकूण दोन हजार २३० कोटी सहा लाखाची रक्कम भरली गेली. प्रत्येक ग्राहकाला ऑनलाइईन पेमेंटवर ०.२५ टक्के सवलत मिळत असल्याने ऑनलाइन वीजबिल भरण्याकडे ग्राहकांचा कल वाढत आहे. ऑनलाइन वीज बिल भरणा करण्यात कोकण प्रादेशिक विभागाचे ग्राहक आघाडीवर असून कोकणातील एकूण ४९ लाख २१ हजार ६९३ ग्राहकांनी एक हजार एक कोटी १२ लाख रुपयांचा भरणा केला आहे.

याखालोखाल पुणे प्रादेशिक कार्यालयाच्या ३३ लाख ७५ हजार ४७१ ग्राहकांनी ७५१ कोटी ८५ लाख, तर नागपूर प्रादेशिक कार्यालयाच्या १९ लाख ३३ हजार २५६ ग्राहकांनी २९९ कोटी १५ लाखाचा भरणा ऑनलाइन केला. औरंगाबाद प्रादेशिक कार्यालयाच्या ९ लाख २३ हजार २८३ ग्राहकांनी १७७ कोटी ९६ लाख रुपयांचा इतका ऑनलाइन वीजबिल भरणा केला.

वीज ग्राहक संगणक किंवा मोबाइल ॲपच्या मदतीने वीज बिल भरू शकतात. यामुळे ग्राहकांचा वेळ आणि श्रम वाचतात. ग्राहक महावितरणच्या मोबइल ॲप किंवा संकेतस्थळावर चालू किंवा थकबाकीची देयके पाहू शकतात. डेबिट कार्ड, क्रेडिट कार्ड किंवा नेटबँकिंगदवारे वीजबिल भरण्याची सुविधा आहे. ऑनलाइन वीजबिल भरल्यास संगणकीकृत पावतीही ग्राहकाला मिळते. महावितरणचे मोबाइल ॲप्लिकेशन मराठी आणि इंग्रजी भाषेत असून ही सेवा २४ तास उपलब्ध आहे. त्यामुळे वीज ग्राहकाला आपले वीज बिल केव्हाही आणि कोठूनही भरता येते. या सुविधेचा लाभ जास्तीत जास्त ग्राहकांनी घ्यावा, असे आवाहन महावितरणने केले आहे.