‘दर्पण’भूमीचे प्रतिबिंब
रत्नागिरी/सिंधुदुर्गनगरी : जिल्ह्यात २४ तासांत करोनाचे नवे ६९ रुग्ण आढळले आहेत. हा आतापर्यंतचा उच्चांक आहे. आता जिल्ह्यातील बाधितांची संख्या ६८३ झाली आहे. काल (एक जुलै) रात्री उशिरा ४७, तर आज (दोन जुलै) सायंकाळी २२ नवे रुग्ण आढळले. त्यामध्ये रत्नागिरी तालुक्यातील २२, दापोली तालुक्यातील १५, खेड तालुक्यातील १३, चिपळूण तालुक्यातील ११ आणि लांजा तालुक्यातील दोन जणांचा समावेश आहे. सिंधुदुर्ग जिल्ह्यातही आज १३ नवे रुग्ण आढळून आले.
रत्नागिरी/सिंधुदुर्गनगरी : रत्नागिरी जिल्ह्यात करोनामुळे आज (३० जून) आणखी एकाचा मृत्यू झाला. त्यामुळे जिल्ह्यातील बळींची संख्या २६ झाली आहे. सिंधुदुर्ग जिल्ह्यातही आज आणखी एकाचा मृत्यू झाल्याने, तेथील बळींची संख्या पाच झाली आहे.
रत्नागिरी : रत्नागिरी जिल्ह्यात करोनामुळे होणारा मृत्युदर कमी करण्यासोबतच रुग्णांसाठी प्लाझ्मा थेरपी सुरू करण्याचा प्रस्ताव पाठवण्याचा महत्त्वपूर्ण निर्णय रत्नागिरी जिल्हास्तरीय करोना टास्क फोर्सच्या बैठकीत आज (३० जून) झाला. त्या प्रस्तावाला मंजुरी मिळाल्यानंतर मुंबई आणि अन्य मोठ्या शहरांप्रमाणेच रत्नागिरीतही करोनाबाधित रुग्णांवर प्लाझ्मा थेरपीचा उपचार करणे शक्य होणार आहे.
मार्च, एप्रिल व मे या लॉकडाउन कालावधीमध्ये ग्राहकांचे मीटर रीडिंग झाले नसल्यामुळे जून महिन्यात वीजबिले जास्त आली आहेत. वीजबिलांसंबंधी वीज ग्राहकांच्या असलेल्या तक्रारी पाहता उच्च शिक्षणमंत्री उदय सामंत यांनी मंगळवारी (३० जून) रत्नागिरी येथे स्वातंत्र्यवीर सावरकर नाट्यगृहात विशेष ग्राहक मेळाव्याचे आयोजन केले आहे.
रत्नागिरी/सिंधुदुर्गनगरी : रत्नागिरी जिल्ह्यात आज (२८ जून) सायंकाळपर्यंतच्या चोवीस तासांत करोनाचे आणखी सहा बाधित रुग्ण आढळले असून, एका महिलेचा मृत्यू झाला आहे. सिंधुदुर्ग जिल्ह्यात आज दिवसभरात करोनाच्या नव्या १४ रुग्णांची नोंद झाली आहे.
रत्नागिरी : रत्नागिरीतील करोनाबाधितांची वाढती संख्या लक्षात घेऊन एक जुलैपासून रत्नागिरीत पुन्हा एकदा लॉकडाउनची कडक अंमलबजावणी केली जाणार आहे. राज्याचे उच्च आणि तंत्रशिक्षणमंत्री उदय सामंत यांनी, तसेच रत्नागिरीचे जिल्हाधिकारी लक्ष्मीनारायण मिश्रा यांनी आज (२८ जून) रोजी सायंकाळी घेतलेल्या पत्रकार परिषदेत ही माहिती दिली.