‘दर्पण’भूमीचे प्रतिबिंब
रत्नागिरी : रत्नागिरी जिल्हा सामान्य रुग्णालयाकडून प्राप्त झालेल्या माहितीनुसार, आज (पाच जून) जिल्ह्यात नऊ नव्या करोना रुग्णांची वाढ झाली आहे. त्यामुळे जिल्ह्यातील आतापर्यंतच्या एकूण रुग्णांची संख्या ३४३वर पोहोचली आहे. त्यापैकी १२९ रुग्ण उपचारांनंतर बरे झाले असून, आतापर्यंत १३ रुग्णांचा मृत्यू झाला आहे. सध्या २०१ रुग्णांवर उपचार सुरू आहेत. दरम्यान, सिंधुदुर्ग जिल्ह्यात काल (चार जून) आठ नवे रुग्ण सापडल्याने जिल्ह्यातील रुग्णांचा आकडा १०५ झाला आहे.
रत्नागिरी/सिंधुदुर्गनगरी : रत्नागिरी जिल्ह्यात आज (चार जून) आणखी १३ नव्या करोनाबाधितांची भर पडल्याने आतापर्यंतच्या एकूण करोनाबाधितांची संख्या ३३४ झाली आहे. काल (तीन जून) एका रुग्णाचा मृत्यू झाला. त्यामुळे जिल्ह्यात आतापर्यंत करोनाला बळी पडलेल्यांची संख्या ११ झाली आहे. दरम्यान, सिंधुदुर्गात काल सहा आणि आज दोन नव्या रुग्णांची भर पडल्याने तेथील रुग्णांचा आकडा ९७ झाला आहे.
रत्नागिरी/मुंबई : भारतीय हवामान विभागाने जाहीर केलेल्या अंदाजानुसार, अरबी समुद्रातील कमी दाबाच्या पट्ट्याचे अखेर चक्रीवादळात रूपांतर झाले असून, ते तीन जून रोजी दुपारी ताशी १०० ते १२० किलोमीटर वेगाने अलिबागच्या जवळ किनाऱ्यावर धडकणार आहे. याबद्दलचा ‘ऑरेंज मेसेज’ (चक्रीवादळाची पूर्वसूचना/दक्षतेचा इशारा) हवामान विभागाने जाहीर केला आहे. मुंबई, पालघर, ठाणे, रायगड या उत्तर कोकणातील जिल्ह्यांसह दक्षिण गुजरातमधील जिल्ह्यांना या वादळाचा थेट फटका बसणार आहे. रत्नागिरी, सिंधुदुर्ग जिल्ह्यातही मुसळधार पाऊस आणि वेगवान वारे वाहणार आहेत. वादळाच्या पार्श्वभूमीवर रत्नागिरीच्या जिल्ह्याच्या मंडणगड, दापोली, गुहागर या तीन तालुक्यांमधील चार हजार नागरिकांचे सुरक्षित ठिकाणी स्थलांतर करण्यात आले असून, खबरदारीचा उपाय म्हणून तीन जूनला सकाळी नऊ ते दुपारी १२ या वेळेत वीजपुरवठा बंद ठेवण्यात येणार आहे.
रत्नागिरी/सिंधुदुर्गनगरी : रत्नागिरी जिल्ह्यात आज (एक जून) सकाळी मिळालेल्या अहवालांनुसार करोनाबाधितांची संख्या १८ने वाढली. तसेच, सिंधुदुर्ग जिल्ह्यातील करोनाबाधितांच्या संख्येत आज (एक जून) १६ने वाढ झाली. त्यामुळे रत्नागिरीतील करोना रुग्णांची एकूण संख्या २८७, तर सिंधुदुर्गातील रुग्णांची संख्या ७२वर पोहोचली आहे.
रत्नागिरी/सिंधुदुर्गनगरी : रत्नागिरी जिल्ह्यातील करोना रुग्णांची एकूण संख्या आज (३१ मे) २६९वर पोहोचली असून, करोनामुळे मरण पावलेल्यांची एकूण संख्या नऊवर पोहोचली आहे. सिंधुदुर्ग जिल्ह्यातही आज तीन नवे रुग्ण सापडल्याने तेथील रुग्णांची एकूण संख्या ५६ झाली आहे.
रत्नागिरी : करोनाच्या संकटाने महाराष्ट्रात रौद्र रूप धारण केलेले असतानाच, मुंबई आणि कोकण किनारपट्टीकडे येत्या दोन दिवसांत चक्रीवादळाचे संकट घोंघावत आहे. त्यामुळे या भागांत अति वेगाने वारे वाहतील, तसेच, काही ठिकाणी अति-मुसळधार पाऊस पडण्याचा अंदाज हवामान खात्याने आज (३१ मे) रात्री सव्वाआठ वाजता जाहीर केलेल्या पत्रकाद्वारे व्यक्त केला आहे. त्यामुळे मच्छिमारांना समुद्रात न जाण्याचा इशारा देण्यात आला असून, ‘एनडीआरएफ’चे जवानही तैनात केले जात आहेत.