रत्नागिरी : पंतप्रधान नरेंद्र मोदी यांनी मन की बातमध्ये दिलेल्या संदेशानुसार रत्नागिरीचे नगरसेवक उमेश कुळकर्णी यांनी धामणसे (ता. रत्नागिरी) येथे आईच्या नावाने पाचशे रोपांचे वितरण केले.
श्री. कुळकर्णी यांनी आपल्या वाढदिवसाचे औचित्य साधून धामणसे या त्यांच्या गावामध्ये ही झाडे वितरित केली. विद्यार्थी, ग्रामस्थ, बचत गटाच्या माध्यमातून ही झाडे घर, आवार, मंदिर, संस्था आदींच्या ठिकाणी लावून या झाडांचे जतन केले जाणार आहे. या सामाजिक बांधिलकीच्या उपक्रमाबद्दल कुळकर्णी यांचे अभिनंदन करण्यात येत आहे.
गेल्या महिन्यात मन की बात हा कार्यक्रम धामणसे येथील श्री रत्नेश्वर ग्रंथालयाच्या सभागृहात प्रक्षेपित करण्यात आला होता. त्यावेळी पंतप्रधान नरेंद्र मोदी यांनी आईच्या नावाने झाड लावण्याचे आवाहन केले होते. श्री रत्नेश्वर ग्रंथालयाचे अध्यक्ष उमेश कुळकर्णी यांनी हा उपक्रम गावात राबवण्याचे ठरवले. त्यानुसार त्यांनी वाढदिवसाचे औचित्य साधून धामणसे गावात ५०० रोपांचे वितरण केले.
श्री. कुळकर्णी आणि जिल्हा खरेदी विक्री संघाच्या संचालिका सौ. ऋतुजा कुळकर्णी यांनी या झाडांचे वितरण प्राथमिक, माध्यमिक शाळांच्या विद्यार्थ्यांना केले. यात आवळा, जांभूळ, कोकम, कदंब, चिंच अशा विविध झाडांच्या रोपांचा समावेश आहे. यावेळी धामणसे गावचे सरपंच अमर रहाटे, उपसरपंच अनंत जाधव, माध्यमिक विद्यालयाचे मुख्याध्यापक व गावचे माजी सरपंच अविनाश सखाराम तथा नाना जोशी, माध्यमिक विद्यालयाचे अध्यक्ष मुकुंद जोशी, शिक्षक गायकवाड,ग्रामपंचायत सदस्य समीर सांबरे, संजय गोनबरे, वैष्णवी धनावडे, रेश्मा डाफले, माजी सरपंच विलास पांचाळ, दत्ताराम चव्हाण, प्रशांत रहाटे, दीपक जाधव, सुनील लोखंडे, अविनाश लोखंडे, ज्येष्ठ ग्रामस्थ दत्ताराम रेवाळे, मारुती लोगडे, दीपक सांबरे तसेच मोठ्या प्रमाणात ग्रामस्थ उपस्थित होते.
यावेळी श्री. कुळकर्णी म्हणाले की, पंतप्रधान मोदी साहेब यांनी सांगितल्याप्रमाणे आपण सर्वजण आपल्या आईवर प्रेम करतो. त्याप्रमाणेच आपण आईच्या नावे झाड लावून ते जगवावे. त्या झाडावरही प्रेम करावे. ते झाड मोठे होण्याकरिता पाणी, संरक्षण द्यावे. धामणसे गावाप्रमाणेच अन्य ठिकाणीही अशी झाडे लावली तर रत्नागिरी जिल्ह्यात वनांचे आच्छादन नक्कीच वाढेल व ग्लोबल वॉर्मिंगमुळे होणारे नुकसान कमी करणे शक्य होईल.
कोकण मीडियाला विविध सोशल मीडियावर फॉलो करण्यासाठी खाली दिलेल्या पर्यायांवर क्लिक करा.टेलिग्राम, व्हॉट्सअॅप, यू-ट्यूब, ट्विटर, फेसबुक, इन्स्टाग्राम, इन्स्टामोजो, गुगल प्ले बुक्स, गुगल न्यूज, बुकगंगा, साउंडक्लाउड
Something went wrong. Please refresh the page and/or try again.
