यूपीएससी परीक्षांसाठी स्वतःचे तंत्र विकसित करणे गरजेचे – के. मंजूलक्ष्मी

सिंधुदुर्गनगरी : प्रत्येकाचे अभ्यासाचे वेगळे तंत्र असते. केंद्रीय लोकसेवा आयोगाच्या (यूपीएससी) परीक्षा देताना स्वतःचे परीक्षण करून अभ्यासाचे तंत्र विकसित करणे गरजेचे आहे, असे प्रतिपादन जिल्हाधिकारी के. मंजूलक्ष्मी यांनी केले.

‘प्रेरणा’ उपक्रमाअंतर्गत स्पर्धापरीक्षा देणाऱ्या विद्यार्थ्यांसाठी फेसबुक लाइव्हच्या माध्यमातून पहिल्या ऑनलाइन मार्गदर्शन सत्राचे आयोजन आज, १८ ऑगस्ट रोजी सिंधुदुर्ग जिल्हा प्रशासनातर्फे करण्यात आले होते. त्यावेळी जिल्हाधिकारी के. मंजुलक्ष्मी बोलत होत्या.

जिल्हा परिषदेचे मुख्य कार्यकारी अधिकारी प्रजित नायर, सहाय्यक जिल्हाधिकारी संजिता महोपात्रा यांनीही यावेळी विद्यार्थ्यांना मार्गदर्शन केले.

पूर्वपरीक्षेसाठी विषयाची निवड करताना आपल्या आवडीच्या विषयाची निवड करावी, असे सांगून जिल्हाधिकारी म्हणाल्या, या परीक्षांना सामोरे जाताना विषयाची निवड, अभ्यासक्रम, पुस्तकांची निवड याचबरोबर मुलाखतीची तयारी महत्त्वाची असते. अनेक पुस्तकांचा अभ्यास करण्यापेक्षा एकाच पुस्तकाचा वारंवार अभ्यास करणे जास्त फायद्याचे ठरते. कोचिंग क्लासेसचा फायदा होतो. त्यामुळे अभ्यासाची वातावरणनिर्मिती होत असते. अभ्यास करत असताना त्याचे वेळापत्रक तयार करणेही तितकेच महत्त्वाचे आहे. पेपर सोडवत असतानाही वेळेचे नियोजन केले पाहिजे. त्यासाठी पूर्वतयारी आवश्यक आहे. पेपर सोडवण्याचा सराव करावा. लिखाणही तितकेच महत्त्वाचे आहे. मॉक टेस्ट नियमितपणे कराव्यात. यासर्व तयारीसोबतच मनोबल राखण्यासाठीही प्रयत्न झाले पाहिजेत. तुम्हाला संगीत आवडत असेल तर दिवसातील काही वेळ ते ऐका, त्यामुळे अभ्यासात एकाग्रता वाढवण्यासाठी तुम्हाला मदतच होणार आहे. फक्त अभ्यास करणे, इतर गोष्टी न करणे असे करू नका. नियमितपणे वर्तमानपत्रे वाचावीत, त्यातून नोट्स काढाव्यात, प्रत्येक क्षेत्रातील महत्त्वाच्या गोष्टींची तुम्हाला माहिती असली पाहिजे, असेही जिल्हाधिकाऱ्यांनी सांगितले.

मुख्य कार्यकारी अधिकारी प्रजित नायर म्हणाले, मुलाखत हा एक महत्त्वाचा टप्पा आहे. त्याची तयारी करण्यासाठी मॉक इंटरव्ह्यू महत्त्वाचा आहे. विषयांची निवड आवडीने करावी. प्रत्येक विषयावर बाजारामध्ये अनेक पुस्तके आहेत. सर्व उपयुक्त आहेत म्हणून सर्व वाचण्याऐवजी समग्र पुस्तक निवडावे. मुलाखतीच्या वेळी कोणताही ताण घेऊ नये.

सहाय्यक जिल्हाधिकारी संजिता महोपात्रा म्हणाल्या, आताच्या काळात इंटरनेटवर सर्व माहिती उपलब्ध आहे. पुस्तके, अभ्यासक्रम यांची सर्व माहिती ऑनलाइन उपलब्ध आहे. विद्यार्थ्यांनी त्याचाही अभ्यास करावा.

यावेळी विद्यार्थ्यांना पूर्वपरीक्षा, मुख्य परीक्षा, मुलाखत, विषयांची निवड, अभ्यासक्रम, अभ्यासाची पद्धत, तंत्र यासह विविध विषयांची तयारी करण्यासाठी करावयाचे नियोजन याविषयी मार्गदर्शन करण्यात आले.

जिल्ह्यात प्रेरणा उपक्रमाअंतर्गत विद्यार्थ्यांना मार्गदर्शन करण्यासाठी अशा प्रकारचे पहिलेच सत्र आयोजित करण्यात आले होते. पुढील सत्रांमध्ये भाषा तसेच महाराष्ट्र लोकसेवा आयोग याविषयीही विद्यार्थ्यांना मार्गदर्शन करण्यात येणार आहे.
फेसबुक लाइव्हच्या माध्यमातून केलेले मार्गदर्शन पाहण्यासाठी सोबतच्या लिंकवर जा –

https://fb.watch/7sPgbQ_Yz-/

Follow Kokan Media on Social Media

Leave a Reply