चिपळूण तालुका पर्यटन चळवळीला उभारी देण्याचा निर्धार

चिपळूण : चिपळूण तालुका पर्यटन चळवळीला उभारी देण्याचा निर्धार चिपळूण येथील एका चर्चासत्रात करण्यात आला.

चिपळूण येथील अॅक्टिव्ह ग्रुपतर्फे चिपळूण तालुका परिसर पर्यटन विकास या विषयावर हे चर्चासत्र गुरुवारी (दि. २५ मे) झाले. चर्चासत्रात ग्लोबल चिपळूण टुरिझमचे चेअरमन श्रीराम रेडीज, पर्यटन-पर्यावरण क्षेत्रातील कार्यकर्ते, लेखक धीरज वाटेकर, ग्रामकौशल्य मार्गदर्शन केंद्राच्या प्रज्ञा जोगळेकर, प्रसिद्ध हॉटेल व्यावसायिक प्रकाश (बापू) काणे, मिलिंद कापडी, कृषी अधिकारी मनोज गांधी आदींनी मार्गदर्शन केले.

बापू काणे यांनी उपस्थितांचा परिचय, स्वागत करून या क्षेत्रातील अनुभव आणि नवी दिशा यावर आपली भूमिका मांडली. अॅक्टिव्ह ग्रुपचे अध्यक्ष कैसर देसाई यांनी आपल्या संस्थेचा परिचय करून दिला. त्यांनी चिपळूण तालुका परिसर पर्यटन विकास चळवळीला उभारी देण्याचे आवाहन केले. रामशेठ रेडीज यांनी ग्लोबल चिपळूण टुरिझम सोसायटीने केलेल्या स्थानिक परिसराच्या पर्यटन आणि पूरक कामाची माहिती दिली. ग्रामकौशल्य मार्गदर्शन केंद्राच्या प्रज्ञा जोगळेकर यांनी ‘पर्यटन व महिला’ अंतर्गत हस्तकला कौशल्याबाबत माहिती दिली. शहरातील ओमेगा हॉटेलचे संचालक मिलिंद कापडी यांनी चिपळूण पर्यटनातील हॉटेलिंग व्यवसायाची जबाबदारीची आणि भूमिका विशद केली. कृषी अधिकारी, सामाजिक कार्यकर्ते मनोज गांधी यांनी शाश्वत कृषी पर्यटन व्यवसाय आणि सामाजिक भान याबाबत विचार मांडले.

पर्यटन-पर्यावरण क्षेत्रातील कार्यकर्ते, लेखक धीरज वाटेकर यांनी चिपळूण तालुका परिसर आणि समग्र कोकण पर्यटन : काल – आज – उद्या या मुद्द्यांनुरूप मांडणी केली. सुरुवातीला त्यांनी श्रीविंध्यवासिनी देवस्थानने ‘श्रीकार्तिकेय’ मूर्तीचे दर्शन वर्षभर खुले करण्याचा महत्त्वाचा निर्णय घेतल्याबद्दल विश्वस्तांचे विशेष अभिनंदन केले. जगभरातील पर्यटक हेरिटेजच्या प्रेमापोटी भ्रमंती करत असतो. हा धागा पकडून आगामी काळात शहराला उपलब्ध होणाऱ्या रस्ते आदी दळणवळण सुविधांच्या पार्श्वभूमीवर हेरिटेज आणि सह्याद्रीतील आजूबाजूच्या भटकंतीसाठी ‘चिपळूण’ प्रसिद्ध आणि विकसित करायला हवे असल्याची भूमिका मांडली. सह्याद्रीतील आजूबाजूच्या भटकंतीसाठी वाशिष्ठी बॅकवॉटर आणि क्रोकोडाइल सफारी, मराठी भाषेतील श्रेष्ठ कादंबरीकार श्री. ना. पेंडसे यांची ‘तुंबाडचे खोत’ या द्विखंडी कादंबरीचा परिसर, निसर्गरम्य दिवा बेट, शिरवलीचे खासगी पक्षी अभयारण्य, मल्हार इंदुलकर यांचे ‘अरण्यावाट’ इको-स्टे, गोविंदगड (गोवळकोट) किल्ला, ‘पर्वतीय वनदुर्ग’ किल्ला वासोटा, किल्ले भैरवगड, किल्ले तिवरेगड, किल्ले बारवई (१२ कोरीव लेणी, ओवरी), किल्ले जंगली जयगड, तिवरे ते मालदेव व्हाया बैलमारव घाट, रामबाण, नांदिवसे देवराई, दाभोळ खाडी आदी हेरिटेजची माहिती दिली. या सर्वांचे आधुनिक स्वरूपात डॉक्युमेंटेशन करून ते शहरातून जाणाऱ्या महामार्गारून प्रवास करणाऱ्या पर्यटकांसाठी एखाद्या अद्ययावत ‘अॅम्फी थिएटर’मध्ये पाहायला उपलब्ध करायला हवे, असे त्यांनी सांगितले. चिपळूण पर्यटन मोठ्या फलकांद्वारे लोकाभिमुख करण्याची गरज आहे. पर्यटन ही शाश्वत आणि दीर्घकाळ टिकणारी प्रक्रिया बनायला हवी आहे. चिपळूण पर्यटन विकासासाठी पर्यटन संस्कृती व लोकसहभाग महत्त्वाचा असल्याचे ते म्हणाले. ‘बॅकवॉटर आणि क्रोकोडाइल सफारी महोत्सव’ आदी शहर व तालुका पर्यटन विकासासाठी शासकीय आस्थापनांकडून निधी उपलब्ध व्हायला हवा असल्याचे त्यांनी सांगितले. आगामी काळात चिपळूणात शहर सह्याद्रीतील आजूबाजूच्या भटकंतीसाठी प्रसिद्ध व्हायला हवे आहे, असे ते म्हणाले.

श्रीक्षेत्र परशुराम येथील ‘डोंगरमाथा’ इको टुरिझम प्रकल्पाचे मंगेश गोवेकर यांनी निसर्ग-पर्यावरण, जैवविविधता पर्यटन, साहस पर्यटन याविषयी आपले अनुभव सांगितले. खुल्या मुक्त चर्चेदरम्यान केतकीतील ‘अरण्यक’ प्रकल्पाचे संचालक विनीत वाघे यांनी नैसर्गिक वने, सामाजिक, सांस्कृतिक पर्यटन यात ते राबवत असलेल्या प्रयोगांची माहिती दिली. दिनेश दळवी यांनी वालोटी गावात वसलेल्या त्यांच्या निसर्ग व कृषी पर्यटन प्रकल्पातील प्रयोगांची ओळख करून दिली. शहरातील विश्व रसायन आरोग्य केंद्राचे डॉ. अतिन औताडे यांनी आयुर्वेद वैद्यकीय पर्यटन याबाबतची माहिती दिली. ज्येष्ठ महिला जलतरण क्रीडापटू, निसर्ग पर्यटनप्रेमी श्रीमती माधवी साठे यांनी स्वानुभव सांगितले.

या चर्चासत्रास पर्यटनप्रेमींचा उत्स्फूर्त प्रतिसाद लाभला. आभार ‘पर्यटनदूत’ समीर कोवळे यांनी मानले.

कोकण मीडियाला विविध सोशल मीडियावर फॉलो करण्यासाठी खाली दिलेल्या पर्यायांवर क्लिक करा.
टेलिग्राम, व्हॉट्सअॅप, यू-ट्यूब, ट्विटर, फेसबुक, इन्स्टाग्राम, इन्स्टामोजो, गुगल प्ले बुक्स, गुगल न्यूज, बुकगंगा, साउंडक्लाउड

Follow Kokan Media on Social Media
Follow Kokan Media on Social Media

Leave a Reply