बारावीच्या निकालात कोकण विभागीय मंडळाचे प्रथम स्थान कायम

रत्नागिरी : महाराष्ट्र राज्य माध्यमिक व उच्च माध्यमिक शिक्षण मंडळातर्फे घेण्यात आलेल्या बारावीच्या परीक्षेत कोकण विभागीय मंडळाने ९६.७४ टक्के निकालासह पहिले स्थान कायम राखले आहे. राज्याचा निकाल ९१.८८ टक्के लागला आहे.

या परीक्षेस राज्यातील पुणे, नागपूर, छत्रपती संभाजीनगर, मुंबई, कोल्हापूर, अमरावती, नाशिक, लातूर व कोकण या नऊ विभागीय मंडळांमधून विज्ञान, कला, वाणिज्य व व्यवसाय अभ्यासक्रम व आयटीआय या शाखांसाठी एकूण १४,२७,०८५ नियमित विद्यार्थ्यांनी नोंदणी केली होती. त्यापैकी १४,१७,९६९ विद्यार्थी परीक्षेला बसले. त्यापैकी १३,०२,८७३ विद्यार्थी उत्तीर्ण झाले आहेत. उत्तीर्णतेची टक्केवारी ९१.८८ आहे. (उर्वरित बातमी जाहिरातीच्या खाली)
खासगी विद्यार्थी म्हणून नोंदणी केलेल्या विद्यार्थ्यांची एकूण संख्या ३६,१३३ एवढी असून, त्यापैकी ३५,६९७ विद्यार्थी परीक्षेला बसले. २९,८९२ विद्यार्थी उत्तीर्ण झाले आहेत. त्यांच्या उत्तीर्णतेची टक्केवारी ८३.७३ आहे.
या परीक्षेला राज्यातील नऊ विभागीय मंडळांमधून सर्व शाखांमधून एकूण ४२,३८८ पुनर्परीक्षार्थी विद्यार्थ्यांनी नोंदणी केली होती. त्यापैकी ४२,०२४ विद्यार्थी परीक्षेला बसले. त्यापैकी १५,८२३ विद्यार्थी उत्तीर्ण झाले. त्यांची एकूण उत्तीर्णतेची टक्केवारी ३७.६५ आहे.
या परीक्षेला नऊ विभागीय मंडळांमधून सर्व शाखांमधून एकूण ७३१० दिव्यांग विद्यार्थ्यांनी नोंदणी केली होती. त्यापैकी ७२५८ दिव्यांग विद्यार्थी परीक्षेला बसले आणि ६७०५ दिव्यांग विद्यार्थी उत्तीर्ण झाले. त्यांची उत्तीर्णतेची टक्केवारी ९२.३८ आहे.
सर्व विभागीय मंडळांतून नियमित विद्यार्थ्यांचा कोकण विभागाचा निकाल (९६.७४ %) सर्वाधिक असून, सर्वांत कमी निकाल लातूर विभागाचा (८९.४६ %) आहे.
सर्व विभागीय मंडळांतून नियमित मुलींची उत्तीर्णतेची टक्केवारी ९४.५८% असून, मुलांची उत्तीर्णतेची टक्केवारी ८९.५१ % आहे. म्हणजेच मुलींची उत्तीर्णतेची टक्केवारी मुलांपेक्षा ५.०७% ने जास्त आहे. एकूण १५४ विषयांपैकी ३७ विषयांचा निकाल १०० % आहे.
गुणपडताळणी, उत्तरपत्रिकांच्या छायांकित प्रती, पुनर्मूल्यांकन यासाठी https://verification.mh-hsc.ac.in/ या वेबसाइटवर माहिती मिळेल. निकालाची वैशिष्ट्ये खाली दिली आहेत.