रत्नागिरीत सायकलवरून गस्त पोलिसांच्या विचाराधीन

रत्नागिरी : रत्नागिरी शहरात लवकरच पोलीस सायकलवरून गस्त घालताना दिसू लागतील. जिल्हा पोलीस अधीक्षक धनंजय कुलकर्णी यांनीच तसा विचार व्यक्त केला.

दरवर्षी ३ जून रोजी जागतिक सायकल दिन साजरा होतो. यानिमित्त जगभरात विविध उपक्रम आयोजित केले जातात. रत्नागिरी सायकलिस्ट क्लबने रत्नागिरी शहरात रविवारी (दि. ४ जून) सायकल फेरी आयोजित केली होती. जिल्हा पोलीस अधीक्षक धनंजय कुलकर्णी आणि अन्य पोलिसांनी या फेरीत सुरवातीपासून शेवटपर्यंत सायकल चालवून सर्व सायकलस्वारांना प्रोत्साहन दिले. श्री. कुलकर्णी यांनी सांगितले की, रत्नागिरी सायकलिस्ट क्लबचे कार्य सुरेख प्रकारे सुरू आहे. सायकलिंगमुळे शरीराचा चांगला व्यायाम होतो. माणूस तंदुरुस्त राहतो. लहान-मोठ्यांनी सायकलिंग केले पाहिजे. रत्नागिरी जिल्हा पोलीस दल आपल्या सर्व उपक्रमात सहभागी होईल. सायकलवरून पेट्रोलिंग केले पाहिजे, असा विचार या फेरीच्या निमित्ताने आपल्या मनात आल्याचे त्यांनी मनोगतादरम्यान सांगितले.

या फेरीने रत्नागिरी सायक्लिस्ट क्लबच्या शिरपेचात मानाचा तुरा रोवला गेला. फेरीमध्ये ७ ते ७८ वर्षांच्या वयोगटातील १०९ सायकलप्रेमी सहभागी झाले. त्यात विद्यार्थी, डॉक्टर, वकील, व्यावसायिक, बँकर्स, विद्यार्थी, गृहिणी, ज्येष्ठ नागरिक आणि आरसीसीचे रायडर्स सहभागी झाले. वक्तशीरपणासाठी प्रसिद्ध असलेल्या रत्नागिरी सायकलिस्ट नाचणे, साळवी स्टॉप, माळनाका, रामआळी, स्वातंत्र्यलक्ष्मी चौक, टिळक आळीमार्गे मांडवी येथपर्यंत फेरी काढण्यात आली.

फेरीदरम्यान विविध घोषणा सायकलप्रेमींकडून देण्यात आल्या. भारतमाता की जय, सायकल चालवा, तंदुरुस्त राहा, एक, दोन, तीन चार रत्नागिरी सायकलिस्ट क्लबचा जयजयकार, अशा घोषणांचा त्यात समावेश होता. सांगतेदरम्यान रत्नागिरीतील एकमेव डबल एसआर अमित कवितके, एसआर यतीन धुरत, एसआर डॉक्टर नितीन सनगर यांनी सर्व सायकलप्रेमींना सायकलविषयक मार्गदर्शन केले. याप्रसंगी २० वर्षांखालील सायकलप्रेमींसाठी खास लकी ड्रॉचे आयोजन करण्यात आले होते. यातून अनेकांनी सायकलीच्या नवनवीन वस्तू भेट म्हणून देण्यात आल्या. कोणतेही प्रायोजकत्व न घेता सायकलप्रेमींच्या, समस्त रत्नागिरीकरांच्या आणि पोलीस तसेच जिल्हा प्रशासनाच्या सहकार्याने रत्नागिरी सायक्लिस्ट क्लबने ही फेरी यशस्वी केली. सायकलपटूंसाठी पाणी, अल्पोपाहाराची व्यवस्था, डिझाइन, प्रिंटिंग आदी सर्व व्यवस्था रत्नागिरी सायकलिस्ट क्लबने केली आणि समस्त रत्नागिरीकरांनी त्याला उदंड प्रतिसाद दिला. रत्नागिरी सायकलिस्ट क्लबचा उपक्रम म्हणजे नियोजन, शिस्तबद्ध, वक्तशीर आणि सर्वसमावेशक असतो ही सर्वसामान्य रत्नागिरीकरांची भावना अजूनच दृढ झाली.

सायकल चालवणे हेच रत्नागिरी सायकलिस्ट क्लबचे शुल्क

रत्नागिरी सायकलिस्ट क्लबचे सदस्य होण्याकरिता आठवड्याला किमान ७५ आणि महिन्याला किमान ३०० किमान किलोमीटर सायकल चालवण्याची अनोखे शुल्क आकारले जाते. रत्नागिरीत सध्या १०० हून अधिक सायकलस्वार क्लबचे सदस्य असून ही संख्या दिवसेंदिवस वाढत आहे. रत्नागिरी जिल्हा सायकल संमेलनाचे यशस्वी आयोजन केल्यानंतर अनेक सायकलिस्ट आता रत्नागिरीच्या रस्त्यावर दिसू लागले आहेत. रत्नागिरीत सायकलसंस्कृती वृद्धिंगत व्हावी, यासाठी रत्नागिरी सायकलिस्ट क्लब अनेकविध उपक्रम राबवत आहे. त्यात सहभागी होण्याचे आवाहन करण्यात आले आहे.