सिंधुदुर्ग जिल्ह्यात करोनाचा एकमेव नवा रुग्ण

सिंधुदुर्गनगरी : सिंधुदुर्ग जिल्ह्यात आज एकच नवा रुग्ण आढळला. मात्र एकही रुग्ण आज बरा झाल्याने घरी जाऊ शकला नाही.

प्रभारी जिल्हा शल्य चिकित्सक डॉक्टर श्रीपाद पाटील यांच्या अहवालात ही माहिती देण्यात आली आहे. आज (१९ डिसेंबर) दुपारी १२ वाजेपर्यंतच्या करोनाविषयक अहवालानुसार जिल्ह्यात आज कोणत्याही रुग्णाचा मृत्यू झाल्याची नोंद नाही.

जिल्ह्यात सध्या सक्रिय रुग्णांची संख्या २२ असून आतापर्यंत ५१ हजार ७३७ रुग्ण बरे होऊन घरी गेले आहेत. आतापर्यंत ५३ हजार २२२ रुग्ण बाधित आढळले, तर आतापर्यंत १ हजार ४६३ रुग्णांचा मृत्यू झाला.

जिल्ह्यात आज आढळलेला नवा रुग्ण कणकवली तालुक्यातील आहे.

जिल्ह्यात सध्या सक्रिय असलेल्या २२ रुग्णांपैकी एक रुग्ण ऑक्सिजनवर आहे, तर एक रुग्ण चिंताजनक असल्याने व्हेंटिलेटरवर आहे. जिल्ह्यातील तालुकानिहाय सक्रिय रुग्णांची संख्या अशी – देवगड ३, दोडामार्ग ०, कणकवली ८, कुडाळ २, मालवण २, सावंतवाडी ५, वैभववाडी ०, वेंगुर्ले २, जिल्ह्याबाहेरील ०.

आज एकाही रुग्णाचा मृत्यू नोंदविला गेला नसल्याने जिल्ह्यातील एकूण मृतांची संख्या १४६३ एवढीच आहे. जिल्ह्यातील आजपर्यंतच्या मृतांची तालुकानिहाय एकूण संख्या अशी – देवगड – १८०, दोडामार्ग – ४४, कणकवली – २९९, कुडाळ – २४३, मालवण – २८८, सावंतवाडी – २०७, वैभववाडी – ८२, वेंगुर्ले – १११, जिल्ह्याबाहेरील रुग्ण – ९.