कलांगण, स्वराभिषेकतर्फे रत्नागिरीत सोमवारी शास्त्रीय गायन मैफल

रत्नागिरी : ज्येष्ठ संगीतकार सौ. वर्षा भावे संचालित कलांगण-मुंबई आणि स्वराभिषेक-रत्नागिरी यांच्या संयुक्त विद्यमाने सोमवारी (दि. १९ जून) विशेष शास्त्रीय मैफिलीचे आयोजन करण्यात आले आहे.

मुंबई आणि रत्नागिरीतील शास्त्रीय संगीत शिकणाऱ्या युवा कलाकारांना व्यासपीठ मिळवून देण्यासाठी आणि विद्यार्थ्यांमध्ये शास्त्रीय संगीताची आवड निर्माण होण्यासाठी स्वराभिषेक आणि कलांगण या दोन संस्थांतर्फे मुंबई आणि रत्नागिरी येथे एकत्रित मैफिलीचे आयोजन दर तीन महिन्यांनी केले जाते. रत्नागिरीत थिबा पॅलेसजवळील परमपूज्य गगनगिरी महाराज आश्रमाच्या रंगमंचावर सोमवारी सायंकाळी साडेसहा वाजता ही मैफिल होणार आहे. यावेळी अथर्व कंठी, सौम्या क्षीरसागर (मुंबई), मीरा सोवनी, ऋग्वेदा हळबे (रत्नागिरी) हे विद्यार्थी शास्त्रीय गायन करणार आहेत. त्यांना महेश दामले, तन्वी मोरे (संवादिनी), केदार लिंगायत, राजू धाक्रस (तबला) संगीतसाथ करणार आहेत. यावेळच्या मैफिलीला वर्षा भावे उपस्थित राहणार आहेत.