रत्नागिरी सायकलिस्ट क्लबतर्फे ४ मे रोजी किड्स सायक्लोथॉन

रत्नागिरी : रत्नागिरी सायकलिस्ट क्लबतर्फे येत्या ४ मे रोजी रत्नागिरी शहरात तालुकास्तरीय किड्स सायक्लोथॉनचे आयोजन करण्यात आले आहे. मुलांनी मोबाइलवर गेम खेळण्याऐवजी सुट्टीचा आनंद लुटावा, याकरिता सायकल चालवावी आणि तंदुरुस्त राहावे, या उद्देशाने सायक्लोथॉन आयोजित केली आहे.

सुवर्णसूर्य फाउंडेशनने या स्पर्धेसाठी छोटे अंतराळवीर चालवणार सायकल (Little Astronauts on Wheels) अशी संकल्पना मांडली आहे. या उपक्रमामधून खगोल विज्ञानाविषयी भरीव माहिती मिळून शालेय विद्यार्थ्यांच्या मनात एक कुतूहल तयार करण्याचा प्रयत्न केला जाणार आहे. महावीर जयंतीला ही स्पर्धा जाहीर झाली असून हनुमान जन्मोत्सवाच्या निमित्त Little Astronauts on Wheels ही संकल्पना जाहीर करण्यात आली आहे.

आतापर्यंत विविध शाळांमधील जवळपास १०० हून जास्त विद्यार्थ्यांनी म्हणजेच छोट्या अंतराळवीरांनी सायकल चालवण्यासाठी नोंदणी केली आहे. यामध्ये वय वर्षे ६ ते १० साठी ५ किमी व वय वर्ष ११ ते १५ करिता १० किमी अंतर ठेवण्यात आले आहे. प्रथम नोंदणी करणाऱ्या २०० स्पर्धकांना टी शर्ट मिळणार आहे. तसेच सर्व सहभागी स्पर्धकांना आकर्षक मेडल, ई-प्रमाणपत्र तसेच सुरस फूड्स- द फूड कल्चरच्या माध्यमातून अल्पोपाहार देण्यात येणार आहे.

ग्रहमालेतील ग्रह या ५ आणि १० किमीवर विविध ठिकाणी उभे केले जाणार आहेत, जेणेकरून मुलांना आपण अंतराळात फेरफटका मारतो आहोत असे वाटेल, अशा पद्धतीचे नियोजन आहे. सुवर्णसूर्य फाउंडेशनच्या माध्यमातून आतापर्यंत स्पोर्ट्स टुरिझममध्ये नावीन्यपूर्ण संकल्पना अमलात आणल्या गेल्या आहेत. कोकण कोस्टल हाफ मॅरेथॉन, गणपतीपुळे अल्ट्रा मॅरेथॉन ही कोकणवासीयांची स्वप्ने सुवर्णसूर्य फाउंडेशनच्या माध्यमातून यशस्वीपणे पूर्ण झाली आहेत. रत्नागिरी सायकलिस्ट क्लबच्या प्रत्येक उपक्रमाच्या नियोजनात आणि संकल्पनेत स्थापनेपासूनच सुवर्णसूर्य फाउंडेशनचे योगदान राहिले आहे.

रत्नागिरी सायकलिस्ट क्लबची स्थापना मार्च २०२० मध्ये झाली. दरवर्षी क्लबचे सर्व सदस्य मिळून किमान एक लाखांहून अधिक किलोमीटर्सचे सायकलिंग करतात. दुसऱ्या रत्नागिरी जिल्हा सायकल संमेलनाचे आयोजन रत्नागिरी सायकलिस्ट क्लबने केले. त्यानंतर रत्नागिरीत सायकलिंग वाढू लागले. पर्यावरण जागरण, मतदार जनजागृती, हर घर तिरंगा फेरी, वीर सावरकर अभिवादन फेरी, जय गजानन सायकल फेरी, स्वामी स्वरूपानंद जन्मोत्सव फेरी, सायकल दिन, फिट इंडिया फेरी अशा विविध सायकल फेऱ्यांचे आयोजन रत्नागिरी सायकलिस्ट क्लबने वेळोवेळी केले आहे. तसेच सलग दोन वर्षे रोलर कोस्टर सायक्लोथॉन ही राज्यस्तरीय सायकलची स्पर्धाही यशस्वीपणे आयोजित केली आहे. त्याचाच एक भाग म्हणून मुलांसाठी सायक्लोथॉन आयोजित करण्यात आली आहे.

अधिक माहितीसाठी दर्शन जाधव (9970398242), विनायक पावसकर (9405773337), ओंकार फडके (9422050762), केदार देवस्थळी (9763639367) यांच्याशी संपर्क साधावा.

सायक्लोथॉनसाठी प्रवेशमूल्य १९९ रुपये असून ज्यांना या किड्स सायक्लोथॉनमध्ये सायकल चालवून छोटे अंतराळवीर व्हायची इच्छा आहे, त्या बालदोस्तांनी सोबतचा गुगल फॉर्म भरावा.

https://docs.google.com/forms/d/e/1FAIpQLSd2SDLmtkYQD4-Ln10DMwAzqfCAtrtdaNigiiWFu5c9xg9aOA/viewform

कोकण मीडियाला विविध सोशल मीडियावर फॉलो करण्यासाठी खाली दिलेल्या पर्यायांवर क्लिक करा.
टेलिग्राम, व्हॉट्सअॅप, यू-ट्यूब, ट्विटर, फेसबुक, इन्स्टाग्राम, इन्स्टामोजो, गुगल प्ले बुक्स, गुगल न्यूज, बुकगंगा, साउंडक्लाउड