करोनाचे रत्नागिरीत सात, तर सिंधुदुर्गात १८ नवे रुग्ण

रत्नागिरी/सिंधुदुर्गनगरी : रत्नागिरी जिल्ह्यात आज (१९ जानेवारी) करोनाचे नवे ६ रुग्ण आढळले, तर ७ जण करोनामुक्त झाले. सिंधुदुर्ग जिल्ह्यात आज १८ नवे रुग्ण आढळले, तर ६ रुग्ण करोनामुक्त झाले. दोन्ही जिल्ह्यांत आज मृत्यूची नोंद झालेली नाही.

रत्नागिरीतील परिस्थिती

रत्नागिरी जिल्ह्यात आज आरटीपीसीआर चाचणीनुसार चिपळूण आणि राजापूर तालुक्यात प्रत्येकी एक रुग्ण सापडला. रॅपिड अँटिजेन चाचणीनुसार चिपळुणात ३, तर संगमेश्वर तालुक्यात २ बाधित रुग्ण आढळले. (दोन्ही मिळून एकूण ६). एकूण रुग्णांची संख्या आता ९४१२ झाली आहे.

आज आणखी १६९ जणांच्या स्वॅबची चाचणी घेण्यात आली. मात्र त्यांचा अहवाल निगेटिव्ह आला. आतापर्यंत ६४ हजार १२१ जणांचा अहवाल निगेटिव्ह आला आहे.

रत्नागिरी जिल्ह्यातील सक्रिय रुग्णांची संख्या ८९ आहे. त्यातील सर्वाधिक ३६ रुग्ण रत्नागिरीच्या महिला रुग्णालयात दाखल आहेत.

जिल्ह्यात आज ७ जण करोनामुक्त झाल्याने करोनामुक्तांची संख्या ८९५८ झाली आहे. करोनामुक्तीचा दर ९५.१७ टक्के झाला आहे. आज नव्या मृत्यूची नोंद झाली नसल्याने मृतांची संख्या ३४० एवढीच असून मृत्युदर ३.६१ टक्के आहे.

सिंधुदुर्गातील परिस्थिती

सिंधुदुर्गात आज (१९ जानेवारी) दुपारी १२ वाजता आलेल्या अहवालानुसार, १८ नवे करोनाबाधित आढळले, तर ६ जण करोनामुक्त झाले. त्यामुळे करोनाबाधित रुग्णांची एकूण संख्या आता ६०९६ झाली आहे. आतापर्यंत करोनावर मात केलेल्यांची एकूण संख्या ५६९४ झाली आहे. सध्या जिल्ह्यात २३२ रुग्णांवर उपचार सुरू आहेत. जिल्ह्यात आतापर्यंत मृत्यू झालेल्यांची एकूण संख्या १६४ एवढी आहे.