आयुष शिर्के, अवनी घाणेकर यांनी जिंकल्या सायकली

रत्नागिरी : दापोली सायकलिंग क्लबतर्फे आयोजित करण्यात आलेल्या सायकल स्पर्धेत आयुष शिर्के आणि अवनी आशिष घाणेकर यांनी सोडतीतून सायकली जिंकल्या. याशिवाय विजेत्या स्पर्धकांना १० सायकल हेल्मेट आणि इतर अनेक बक्षिसे सोडतीतून वाटण्यात आली.

सायकल चालवण्याचे अनेक फायदे आहेत. सायकल संस्कृती वाढावी आणि सायकलबद्दल आवड निर्माण व्हावी, या हेतूने दापोली सायकलिंग क्लबतर्फे काल (दि. २२ मे) दापोली समर सायक्लोथॉन उत्साहात झाली. त्यामध्ये सर्व वयोगटातील २५० हून अधिक सायकलस्वार सहभागी झाले होते. स्पर्धकांना प्रोत्साहन देण्यासाठी अनेक दापोलीकर सायकल मार्गावर जमले होते.

ही स्पर्धा दापोलीच्या आझाद मैदानातून मान्यवरांच्या उपस्थितीत सुरु झाली. यावेळी प्रमुख अतिथी म्हणून दापोलीच्या नगराध्यक्षा सौ. ममता मोरे, महिला आणि बालकल्याण सभापती सौ. साधना बाळासाहेब बोत्रे, दापोली अर्बन बँकेचे उपाध्यक्ष संदीप दिवेकर, ज्येष्ठ संचालक सुभाष शेठ मालू, संचालिका सौ. संगीता तलाठी, सौ. रमा बेलोसे, पोलीस कर्मचारी स्पर्धकांना प्रोत्साहन देण्यासाठी उपस्थित होते. नगराध्यक्षा ममता मोरे, सभापती साधना बोत्रे यांच्यासह अनेक मान्यवरांनी स्पर्धेत सहभाग घेतला. स्पर्धेत खेड, गुहागर, महाड, पुणे, मुंबईहूनही काही स्पर्धक सहभागी झाले होते. स्पर्धेचा मार्ग आझाद मैदान, डॉ बाबासाहेब आंबेडकर चौक, एव्हरेस्टवीर सुरेंद्र चव्हाण चौक, पांगारवाडी जालगाव, लालबाग, आझाद मैदान असा ५ किलोमीटरचा होता. स्पर्धकांनी यावर अनेक फेऱ्या मारत ५ ते २५ किमी अंतर सायकल चालवत स्पर्धा पूर्ण केली. स्पर्धकांना मेडल आणि प्रमाणपत्र देऊन गौरवण्यात आले.

लकी ड्रॉ बक्षिसामध्ये दापोली अर्बन बँक पुरस्कृत श्री सायकल मार्ट यांच्या सौजन्याने २ सायकल देण्यात आल्या. त्या आयुष शिर्के आणि अवनी आशीष घाणेकर यांनी जिंकल्या. याशिवाय १० सायकल हेल्मेट आणि इतर अनेक बक्षिसे लकी ड्रॉमधून वाटण्यात आली.

स्पर्धेसाठी उत्कर्ष कोकण सेवा संघ, दापोली उपजिल्हा रुग्णालय कर्मचारी, जोशी ब्रदर्स मेडिकल अँड जनरल स्टोअर्स, त्रिस्केलिऑन लक्सरी फॅमिली होम स्टे, सिल्व्हर सॅण्ड बीच रिसॉर्ट (मुरूड), श्रीकांत सायकल शॉप, राहुल राठोड, डॉ. विद्या दिवाण, नीलिमा देशमुख, रेखा जेगलकर, राजेंद्र नाचरे, उमेश रेवाळे, महेश भांबुरे, राजू तलाठी, युवराज पेठे, डॉ. समीर परांजपे, विनोद म्हस्के, पिलू शेठ, लाइफस्टाइल फिटनेस जिम, राहुल मंडलिक, सुनील रिसबूड, संदीप भाटकर, केतन पालवणकर, अंबरीश गुरव, विनय गोलांबडे, पराग केळसकर, सूरज शेठ, प्रशांत पालवणकर, शैलेश मोरे, मृणाल मिलिंद खानविलकर, उत्पल वराडकर, रोहन कदम, राकेश झगडे, आकाश तांबे, झाहीद दादरकर इत्यादींनी मोलाची भूमिका बजावली. दैनंदिन जीवनात सायकलचा वापर अधिक करा आणि इतरांनाही प्रेरित करा, असा संदेश या स्पर्धेच्या निमित्ताने आयोजकांनी दिला आहे.