रत्नागिरीत शुक्रवारी सं. ययाति आणि देवयानी

रत्नागिरी : येथील अखिल चित्पावन ब्राह्मण विद्यार्थी सहाय्यक मंडळाचे सं. ययाति आणि देवयानी हे नाटक पाहण्याची संधी रत्नागिरीतील संगीत नाट्यरसिकांना येत्या शुक्रवारी (दि. १९ एप्रिल) मिळणार आहे.

कुसुमाग्रज ऊर्फ वि. वा. शिरवाडकर यांच्या सिद्धहस्त लेखणीतून उतरलेले पं. जितेंद्र अभिषेकी यांच्या संगीताने अजरामर झालेल्या या नाटकात हे सुरांनो चंद्र व्हा, प्रेम वरदान स्मर सदा, सर्वात्मका सर्वेश्वरा अशी एकापेक्षा एक सरस नाट्यपदे आहेत. भाषासौंदर्य, शब्दसौंदर्य व शब्दरचना यांचा सुरेख संगम असलेले तसेच साहित्यिक सौंदर्याची प्रचीती देणारे मराठी संगीत नाटक परंपरेतील हे उत्कृष्ट नाटक आहे. हे नाटक येथील अखिल चित्पावन ब्राह्मण विद्यार्थी सहाय्यक मंडळ या संस्थेतर्फे शुक्रवारी रात्री साडेनऊ वाजता स्वा. वि. दा. सावरकर नाट्यगृहात सादर होणार आहे.

नुकतेच या नाटकाचे सादरीकरण या संस्थेच्या जुन्या, नव्या दमाच्या कलाकारांनी कोल्हापूर येथे झालेल्या महाराष्ट्र शासनाच्या राज्य नाट्य स्पर्धेत सादर करून तेथील रसिकांची वाहवा मिळवली आहे.

या नाट्यप्रयोगाचे दिग्दर्शक गणेश जोशी व संगीत मार्गदर्शन चिपळूणच्या सौ. स्मिता करंदीकर यांनी केले आहे. तबलासाथ हेरंब जोगळेकर व ऑर्गनसाथ अमित ओक करणार आहेत. नृत्यदिग्दर्शन पूर्वा जोगळेकर, नेपथ्य, रंगभूषा रामदास मोरे, नेपथ्य सहाय्य मोहन धांगडे, किशोर नेवरेकर, संजय लोगडे, सौरभ लोगडे, सुधाकर घाणेकर, प्रकाशयोजना यश सुर्वे, पार्श्वसंगीत अक्षय पेडणेकर, वेशभूषा प्राजक्ता जोशी, निर्मितीप्रमुख राजेंद्र पटवर्धन, अनंत आगाशे व सूत्रधार श्रीनिवास जोशी आहेत. या नाटकाला खल्वायन संस्था आणि व वामन ऊर्फ राजाभाऊ जोग यांचे विशेष सहाय्य लाभले आहे.

या नाटकात युवा गायिका सौ. करुणा चैतन्य पटवर्धन, गोव्याचा दत्तगुरू केळकर तसेच उमेश जोशी, चिन्मय दामले, अविनाश काळे, गणेश जोशी व शमिका जोशी हे कलाकार महत्त्वपूर्ण भूमिका करणार आहेत. ध्वनि व्यवस्था एस. कुमार साऊंड सर्विसचे उदयराज सावंत करणार आहेत. नाट्यव्यवस्थापन दत्ता केळकर करत असून या नाटकाच्या तिकिटांसाठी 9420051286 या क्रमांकावर संपर्क साधावा. नाटकाची तिकीटविक्री १७ एप्रिलपासून सकाळी ९ ते रात्री ८ या वेळेत चालू राहणार आहे.

कोकण मीडियाला विविध सोशल मीडियावर फॉलो करण्यासाठी खाली दिलेल्या पर्यायांवर क्लिक करा.
टेलिग्राम, व्हॉट्सअॅप, यू-ट्यूब, ट्विटर, फेसबुक, इन्स्टाग्राम, इन्स्टामोजो, गुगल प्ले बुक्स, गुगल न्यूज, बुकगंगा, साउंडक्लाउड